Р.С. Акчурин исемендәге Ашыгыч медицина ярдәме хастаханәсендә бүген узган ел өчен эш нәтиҗәләренә багышланган йомгаклау медицина советы узды. Хастаханәнең төп эш күрсәткечләрен баш табиб вазифаларын вакытлыча башкаручы Роман Джумабаев тәкъдим итте.
Үткән ел медицина учреждениесе өчен киеренке эш чоры һәм җитди казанышлар вакыты булды. Күрсәтелгән ярдәм күләме статистика белән дә раслана: хисап чоры дәвамында Ашыгыч медицина ярдәме хастаханәсе белгечләре 125 меңнән артык пациент мөрәҗәгатен кабул иткән. Аеруча зур йөкләнеш хирургия хезмәтенә туры килгән – хирургик ярдәмгә ихтыяҗ 36 процентка арткан. Табиблар төрле дәрәҗә катлаулылыктагы 15 меңнән артык операцияне уңышлы башкарганнар.
Аерым игътибарга югары технологияле медицина һәм кешеләр гомерен саклап калу өлкәсендәге уңышлар лаек. Ашыгыч медицина ярдәме хастаханәсе трансплантологлары аеруча катлаулы операцияләр сериясен үткәреп, пациентларга тугыз йөрәк, өч бөер һәм өч бавыр күчереп утырткан. Шул ук дәрәҗәдә уңай нәтиҗә – йөклелекне саклап калу юнәлешендә башкарылган эш: чаллы табибларының профессиональлеге нәтиҗәсендә 999 йөклелекне саклап калырга мөмкин булган, бу, асылда, республикада меңгә якын яңа тормыш тууын аңлата.
Медицина советында Татарстан Республикасы сәламәтлек саклау министры Альмир Абашев катнашты. Ведомство башлыгы Яр Чаллы табиблары эшенә югары бәя бирде, аларның төбәк сәламәтлек саклау системасына керткән өлешен билгеләп үтте.
«Афәрин! Мин Ашыгыч медицина ярдәме хастаханәсенең бөтен коллективына һәм элекке җитәкче Марат Фәнис улына рәхмәт әйтергә телим», – дип ассызыклады чыгышында Альмир Абашев. Министр, шулай ук, җитәкчелек алышыну хастаханәдә формалашкан үзенчәлекле профессиональ рухка йогынты ясарга тиеш түгел дип, традицияләр дәвамчылыгы сакланачагына ышаныч белдерде.
Медицина советы иң яхшы хезмәткәрләрне бүләкләү тантанасы белән тәмамланды.
При использовании информации просьба ссылаться на Управление информационной политики и по связям с общественностью.
Җомга, 13 февраль 2026, 14:50