Кышкы чорда Яр Чаллыда М-7 трассасын ничек карап тоталар

Юл хәрәкәте иминлеге комиссиясе утырышында Яр Чаллы территориясе аша узучы федераль әһәмияттәге М-7 «Волга» автомобиль юлын карап тоту турында «Волго-Вятскуправтодор»ның Яр Чаллы филиалы директоры Сергей Лобин доклад белән чыгыш ясады. Шәһәр чикләрендәге федераль трассаның озынлыгы 26 чакрым тәшкил итә. Хәзерге вакытта әлеге участокларны карап тоту дәүләт контрактлары төзелгән ике подрядчы оешма — «Строй-Инжиниринг» ҖЧҖ һәм «Мосты РТ» ҖЧҖ тарафыннан башкарыла. Подрядчыларның төп бурычы — һава шартлары нинди булуга карамастан, юлның тиешле техник торышын һәм юл хәрәкәте иминлеген тәэмин итү.

Трассаны җыештыру һәм эшкәртү өчен шактый күләмдә махсус техника җәлеп ителә. «Строй-Инжиниринг» 34 берәмлек техника куллана, шул исәптән 12 комбинацияләнгән юл машинасы, автогрейдерлар, төягечләр, бульдозерлар һәм роторлы кар чистарткычлар. Үз чиратында, «Мосты РТ» 6 берәмлек техника ярдәмендә ике күперне, дүрт өске җәяүлеләр кичүен һәм су үткәргеч торбаларны карап тота.

Подрядчы оешмаларның техника һәм персонал белән тәэмин ителеше 100 процент тәшкил итә. Кышкы сезонга бозлавыкка каршы материалларның норматив запасы булдырылган: 4 мең тонна комлы-тозлы катнашма һәм 3,7 мең тонна чиста хлорид. Чиста тозлар куллану ГОСТ һәм юл өстендәге тайгаклыкка каршы көрәш технологиясе белән катгый көйләнә, бу исә әйләнә-тирә мохиткә йогынтыны мөмкин кадәр киметергә ярдәм итә.

Юлдагы хәлне тәүлек буе диспетчерлык хезмәте күзәтә. Машина йөртүчеләр өчен 1061 нче һәм 1012 нче чакрымнарда диспетчер телефоннары күрсәтелгән мәгълүмати щитлар урнаштырылган. Һава торышындагы үзгәрешләргә оператив җавап бирергә Татарстан Гидрометеорология үзәге белән төзелгән килешү ярдәм итә. Моннан тыш, 1039 нчы һәм 1049 нчы чакрымнарда реаль вакыт режимында видеокүзәтү функциясе булган автомат юл метеостанцияләре эшли.

Гыйнвар һәм февраль айларындагы мул кар явуга карамастан, юл хезмәтләре штат режимында эшли. Подрядчы оешмаларга кимчелекләрне бетерү буенча 12 күрсәтмә бирелгән, аларның барысы да билгеләнгән вакытта үтәлгән. Һава шартлары аеруча начар булган чорларда республика федераль трассаларында дүрт тапкыр вакытлыча хәрәкәт чикләүләре кертелгән. Татарстан Республикасы буенча Эчке эшләр министрлыгының ЮХИДИ идарәсе белән хезмәттәшлек өзлексез алып барыла.

Юл-транспорт һәлакәтләре еш була торган урыннарны бетерү һәм шәһәр чикләрендәге федераль трассада хәвефсезлекне арттыру максатыннан берничә инфраструктура проекты гамәлгә ашырылган.

1042 нче, 1046 нчы һәм 1056 нчы чакрымнардагы участокларда «Шериф-балка» яктырткыч сигнал җайланмалары урнаштырылган. Практика күрсәткәнчә, алар патруль автомобильләре макетлары белән чагыштырганда нәтиҗәлерәк һәм ныграк саклана. Сарман борылышы алдыннан (1047 нче чакрымда) шаулы разметка төшерелгән, мәгълүмати щитлар куелган, профилактик акцияләр үткәрелгән.

Юл өслегенең саклагыч катламнарын салу эшләре башкарылган, аларның гомуми бәясе 480 млн сумнан артып китә (1047–1053 һәм 1053–1060+655 км участоклары). Уфа ягыннан Орлов боҗрасы районында өстәмә хәрәкәт полосасы өстәлгән.

1051 нче чакрымда («Таиф-НК» АЗС районында) яңа светофор куелган. 1044+830 һәм 1048+620 нче нокталарда яңа Г-сыман терәкләр монтажланган, ә светофорларга яхшырак күренү өчен светодиод тасмалар урнаштырылган.

1046 нчы һәм 1052 нче чакрымнарда сәгатенә 40 км тизлекне чикләүче юл билгеләре куелган. 200дән артык юл билгесе яңартылган һәм 500 метрдан артык металл киртә коймасы алыштырылган.

1046 нчы чакрымда Казан юнәлешенә борылу өчен күчеш-тизлек полосалары («кесәләр») булдырылган.

Аерым итеп, Татарстан Республикасы Рәисе Рөстәм Миңнеханов һәм шәһәр мэры Наил Мәһдиев ярдәмендә гамәлгә ашырылган стратегик проектлар да билгеләп үтелде. Озынлыгы 81 чакрым булган «Түбән Кама һәм Яр Чаллы шәһәрләрен урап узу» автомобиль юлы төзелеше тәмамланган (бәясе — 79 млрд сум). Трасса составында Кама елгасы аша 1,3 чакрымлык күпер, 6 транспорт чишелеше һәм 11 юлүткәргеч бар. 1061–1068 км аралыгындагы федераль юл участогын реконструкцияләү үткәрелгән, эшләрнең бәясе 6 млрд сумнан артып китә. 1061 нче чакрымда (ТЭЦ районында) транспорт чишелеше төзелеше тәмамланган, эшләрнең бәясе 187 млн сумнан артык булган.