Чаллыда Гөлсабира Хәкимова юбилеен билгеләп үтә

Бүген Орган залында РСФСРның һәм ТАССРның Атказанган мәдәният хезмәткәре, «Халыклар дуслыгы», «Почет билгесе» орденнары кавалеры, Яр Чаллы шәһәренең Мактаулы гражданины Гөлсабира Хәкимова 95 яшьлек юбилеен билгеләп үтте. Шунысын билгеләп үтәргә кирәк, 1973 елдан 1982 елга кадәр ул шәһәр Башкарма комитеты рәисе урынбасары булып эшләгән, аннары егерме ел шәһәр картиналар галереясе директоры булган.

Тантаналы чараны Гөлзада Рзаева алып барды. Ул Россия президенты Владимир Путин исеменнән котлау телеграммасын укыды.

Гөлсабира Хәкимованы юбилее белән Башкарма комитет җитәкчесе урынбасары Рамил Хәлимов котлады. Ул Гөлсабира Хәкимовага ТАССР төзелүенең 100 еллыгы уңаеннан шәһәр һәм республика үсеше өчен истәлекле билге тапшырды. Шулай ук юбиляр Чаллы шәһәре мэрының Рәхмәт хаты белән бүләкләнде.

«Сез шәһәрнең бүгенге уңышларына нигез салучы. Бүген залда төзелеш өлкәсенә, мәгариф, сәламәтлек саклау, мәдәният системасына нигез салган беренче төзүчеләр җыелган. Бүген без Татар драма театрын төзекләндерәбез. Кайчандыр барысын да булдырган энтузиастлар төркеме барлыкка килмәсә, бу бина булмас иде, кайчандыр эшчеләр, инженерлар спектакльләр куя башламасалар, бүген «Мастеровые» театры да булмас иде. Бүген сез ачкан музыка һәм сәнгать мәктәпләре 45 һәм 50 еллык юбилейларын билгеләп үтә. Сез башкарган эш бүген дәвам итә», – дип билгеләп үтте Башкарма комитет җитәкчесе урынбасары Рамил Хәлимов.

«1974 елдагы Сабантуйда Гөлсабира Мәхмүтовна тәҗрибәсе буенча, без мең кешелек хордан торган җыр һәм бию бәйрәме ясадык. Алар татар һәм рус телләрендә җырлады. Сәхнәдә артистлар түгел, ә төзүчеләр, завод хезмәтчәннәре чыгыш ясады», – дип хатирәләре белән уртаклашты Гөлзада Рзаева.

Гөлсабира Хәкимованың актив эшчәнлеге нәтиҗәсендә Яр Чаллыда картиналар галереясы, камера оркестры, сәнгать училищесы һәм күп кенә социаль объектлар барлыкка килде. Һәр заводта музыка коллективлары, драма түгәрәкләре, хорлар оештырылды.